Зайсан ауданында мектеп жасындағы балалары бар 4041 отбасы бар. Десе де, аудандағы 1000 отбасына компьютер жетпейді. Ал жаңа оқу жылы болса, қыр астында. Балалар сабағын қашықтан қалай оқымақ?

Жергілікті билік осыған байланысты 1-тоқсанында аз қамтылмаған және көпбалалы отбасы оқушылары, жетім және ата-ана қамқорлығынсыз қалған оқушыларға берілетін тегін тамақты үнемдеп, есесіне компьютер алып бермек.

- Компьютерлер ерекше қажеттіліктері бар оқушыларға және аз қамтылған, көпбалалы оқушыларға беріледі. 2020-2021 оқу жылының 1-тоқсанында аз қамтылмаған және көпбалалы отбасы оқушылары, жетім және ата-ана қамқорлығынсыз қалған оқушылар үшін тамақтану ұйымдастырылмайды. Мектептердің 1-тоқсанына арналған жалпыға міндетті мемлекеттік қордағы үнемделген 32 млн 871 мың теңге қаржыға құны 150 мың теңгелік 331 компьютер сатып алу бойынша жұмыстар жүргізілуде. Сонымен қатар, мектептердегі жаңа үлгідегі 685 компьютер оқушылардың уақытша пайдалануына беріледі, - дейді аудан әкімі.

Зайсан ауданында 2020-2021 оқу жылында 6371 оқушы білім алады. Ауданда 27 мектеп бар. Оның 17 - орта, 8- негізгі орта, 2 - бастауыш мектеп, 16 балабақша, 2 мектептен тыс қосымша білім беру мекемелері жұмыс істейді. Мектепке дейінгі білім берумен қамту бойынша 1 жастан 5 жасқа дейінгі балалар барлық бала санының 92%-ын, 3 - 6 жасқа дейінгілер бала санының 100% құрайды, - дейді аудан әкімі Серік Зайнулдин.

Аудан әкімінің сөзіне сүйенсек, қашықтықтан оқыту форматында оқитын мектептер саны 10. Оқушы саны 2762 ні құрайды екен.

- 10 мектеп кезекші сыныптар ашады. Оқушы саны - 2110. Штаттық режимде оқитын мектептер саны -17. Оқушы саны 1499 бала.17 мектеп қатаң санитарлық талаптарды сақтай отырып, балаларды 100% мектепте оқытады. Сабақтар 2 ауысымда ұйымдастырылады, кабинеттер арасы алшақ болу қамтамасыз етіледі. Сабақ уақыты мен үзіліс уақыты қысқартылып, негізгі пәндер ғана оқытылады. Дене шынықтыру және вариативті пәндер қашықтықтан жүргізіледі. Санитарлық талаптарды орындау үшін 11478,5 мың теңгеге қажетті санитарлық құралдар алынуда. Нақты айтсақ, санитайзерлер, тепловизорлар, кварц лампалары, маскалар, залалсыздандыру заттары, дезинфекциялық кілемшелер, - дейді Серік Зинабекұлы.