15-17 қазан аралығында Талдықорған қаласында әйелдер командалары арасында Суперкубок болады. Оған "Алтай" волейбол командасы қатысады, деп хабарлайды Алтайньюс тілшісі.

Биыл Қазақстандық Волейбол Федерациясы Суперкубоктің ережесін өзгертті. Өзгерткен себебі, «Алтай» қыздар командасы Кубоктің де, Чемпионаттың да иегері болып отыр. Осыған дейін Суперкубокте ел кубогінде жеңіске жеткен команда мен республика чемпионатында жеңіске жеткен команда ойнаса, осы жылы Кубокте финалға жеткен соңғы төрт команда катысады. Бұл өзгеріс біреулерге үміт сыйласа, енді біреулердің жеңіске жету жолын қиындатары анық.

Айта кететін тағы бір жаңалық, енді клубтық Азия Чемпионатына Суперкубокта жеңіске жеткен команда барады. Осыған дейін клубтық Азия Чемпионатына баратын жолдама республика чемпионатында жеңіске жеткен командаға берілетін.

Естеріңізге сала кетейік, 14-21 қыркүйек аралығында Өскемен қаласында Қазақстан Республикасы Кубогі өтті. 3-орын Алматы облысынан қатысқан «Жетісу» командасына, 2-орын павлодарлық «Ертіс-Қазхром» командасына бұйырды. 1-орынды шығысқазақстандық «Алтай» командасы иеленді.

Енді Талдықорған қаласында өтетін турнирге «Алтай» командасы биылғы кубок иегері ретінде қатысып, Суперкубокті иелену үшін барын салып, бағын сынамақ. Суперкубокка «Алтайдан» басқа «Жетісу», «Ертіс-Қазхром» және «Алматы» командалары қатысады.

Жарыс алдында «Алтай» қыздар командасының жетістіктері туралы қысқаша ақпарат беріп кетуді жөн көрдік. «Алтай» командасы Қазақстанның төрт дүркін чемпионы. Биылғы жеңісті қосқанда, үш дүркін ел кубогінің иегері, екі дүркін Суперкубок иегері. Команда сапында ұлттық құрамада ойнайтын ойыншылар бар. Олар – Сана Анарқұлова (шабуылшы), Наталья Шаршакова (орталық бұғаттаушы), Ольга Дробышевская (шабуылдаушы), Кристина Аниконова (орталық бұғаттаушы), Зарина Ситказинова (шабуылшы), Кристина Белова (шабуылшы), Татьяна Фендрикова (либеро) және Елизавета Мейстер (байланыстырушы).