Шақырым қашықтықта орналасқан нысаналарды зеңбірек және пулемет оғымен дәлдеп ату, су толы орлар мен жасанды тоғандардан жүзіп өту, қиын қияға шығып-түсу, қилы кедергілерді артта қалдыру – міне Өскемендегі әскери полигонда ұйымдастырылған Қазақстанның үздік БТР экипаждары мен автокөлік жүргізушілерін анықтау сайысының негізгі міндеттері.

Үш күнге созылған сайыс барысында Шығыс Қазақстанда бас қосқан «Шығыс», «Орталық», «Оңтүстік» және «Батыс» сынды төрт әскери округ пен Қаратемірдегі 6654 әскери бөлімнің және Петропавл қаласындағы Ұлттық Ұланның әскери институтының автокөлік жүргізушілері мен БТР экипаждары бұл жолы барын салды.

Бірінші болып жарыс жолына шыққан БТР экипаждары әскери көлікті орнынан қозғау уақытынан бастап, жоғары жылдамдықта нысананы көздеп ату, тереңдігі үш метрге жуық су толы бассейнді шектеу сызықтарынан аспай жүзіп өтуі, ирекжолдағы кедергілерді айналып өту, габаритті тоннелден өту, батпақ толы орды артта қалдыру бойынша шеберліктерін көрсетті.

Бұл жерде БТР экипажының механик-жүргізушісінің ғана емес, содай-ақ экипаж командирі мен оператордың да шеберліктері сынға түскен сағат болды. Командалық әдісті қалыптастыра білген бронетранспортер экипаждарының арасында қобалжу болмады деуге келмес. Кейбірі су толы бассейнде қиғаштап кетсе, енді бірі оқ ату шебінде сасқалақтап жатты. Дегенмен, экипаждар өздеріне жүктелген міндетті кеш те болса орындап, межелі финишқа бірі қалмай жетті.

Екінші кезекте жарыс жолына автокөлік жүргізушілері шықты. Жүргізушілер арасындағы сайыста нысананы көздеп ату мен су толы бассейнді жүзіп өту болмағанымен, сегіздікті айналып өту, тауға шығып-түсуде кілт тоқтау, батпақ толы ордан кешіп өту, жолсыз жерлерді жоғары жылдамдықта жүру сияқты кедергілер тұрған еді.

– Бүгін «Шығыс» өңірлік қолбасшылығында Ұлттық Ұланның Бас қолбасшысының бұйрығымен үшінші конкурс өткізілуде, – деді Ұлттық Ұланның техника және қарулану бойынша бас қолбасшысы, генерал-майор Сағатбек Нұрахметов. – Конкурстың мақсаты үздік автокөлік жүргізушілері мен БТР экипаждарын анықтау. Сондай-ақ бұл әскерилер арасындағы дайындықты тағы бір пысықтау болып табылады. Біз осындай сайыстар өткізу арқылы әскеріміздің деңгейін анықтап, жауынгерлердің тосыннан болатын жағдайларға дайындығын тексереміз.

Ұлттық Ұланның соғыс жағдайындағы оқыс оқиғаларға дайындығы сыналған сайыс Өскеменнің Аблакет кенті іргесінде орналасқан оқу жаттығу полигонында өтті. 5518 әскери бөлімнің автодромында бақтарын сынаған әскери округтер мен әскери институт жауынгерлері жарысты таңғы мезетте бастап, түс ауа жеңімпаздарды анықтады.

– Мұндай конкурстарды ауа райының қолайсыздығына қарамастан тұрақты түрде өткізуге тырысамыз, – деді Ұлттық Ұланның техника және қарулану бойынша басқармасының бастығы, полковник Константин Ворнкин. – Әр сайысты еліміздің қолбасшылықтары базасында кезектестіре отырып өткізуге тырысамыз. Бұл жолғы таңдап алынған автодром өзінің күрделілігімен ерекшеленеді. Мұнда тік тартатын өрлер мен қиялар бар. Жүргізушілер үшін біршама қиын болатыны рас. АлБТР-ге келер болсақ, қазіргі уақытта ол еліміздің басты әскери техникаларының бірі болып табылады. Бұдан бөлек Қазақстан әскерінде Урал-ВВ, Тигр бронекөліктері де жетерлік.

Алдағы уақытта БТР-лар сайысын танк биатлоны сияқты халықаралық жарыстардың біріне айналдыру мақсатыныңда жоқ еместігін алға тартқан ол бүгінгі сайысқа келген экипаждардың бұған дейін де бірнеше жарыс кезеңдерінен өтіп келген сайыпқыран жауынгерлер екенін атап өтті. Ол жарыс кезеңдерін үйде өту мен қонақта өткізудің арасы жер мен көктей екенін айтады. Дегенмен, алда-жалда орын алатын қақтығыстар кезінде мұндай талғам жасауға мүмкіндік болмайтынын әр жауынгер білуі керек.
Жарыс қорытындысы бойынша «Үздік жүргізуші» байқауы бойынша 73 балл жинаған Шығыс өңірлік қолбасшылығының жүргізушісі жеңіс тұғырынан көрінсе, 71 балл жинаған 6654 әскери бөлімінің жүргізушісі екінші орынды иеленді. Ал үшінші орынға 5573 әскери бөлімінің жүргізушісі көтерілді.

«Үздік БТР экипажы» байқауында бірінші орынды 114 балл жинаған «Шығыс» өңірлік қолбасшылығының жауынгерлері иеленсе, екінші орынға 105 баллмен «Орталық» өңірлік қолбасшылығының жауынгерлері табан тіреді. Ал 103 балл жинаған «Батыс» өңірлік қолбасшылығының жауынгерлері қола жүлдені місе тұтты.