Күршім ауылында Конституция күніне  орай  мемлекеттік рәміздерге арналған монументтің салтанатты ашылуы болды, деп хабарлайды Алтайньюс тілшісі.

Монументтің лентасын қоғамдық кеңестің төрағасы Советхан Искаков, әділет саласының еңбек ардагері Айгүл Мұхамадиева, №3 Күршім гимназиясының «Ұланбасы», «Алтын белгіге» үміткер Жансерім Бауыржановлар қиды.

Іс - шара  барысында аудан тұрғындарын аудан әкімі Д.Қажанов  құттықтап,  «Нұр Отан» партиясының қатарына алғаш кірген мүшелеріне партия билеттерін табыстады. Күршім аудандық сотының төрағасы Н.Байжумин, аудандық мәслихат депутаты, «Күршім» балалар бақшасының меңгерушісі Н.Құдабаева, Күршім №5 орта мектебінің жас маманы, тарих пәнінің мұғалімі Д.Тохтарханов аудан халқына  жылы лебіздерін білдірді.

Сонымен қатар салтанатты іс-шара барысында мемлекеттік қызметке алғаш кірген мемлекеттік қызметшілер салтанатты түрде ант қабылдады.

Салтанатты шарадан  кейін аудан тұрғындары мен өнерге жақын жандардың, сонымен қатар Мәдениет үйінің әртістері көрермендер назарына мерекелік концерт ұсынды. 

Мереке барысы алуан түрлі спорттық жарыстарға ұласты.