Күршім ауданында жастар үшін жаңа футбол алаңы ашылды, деп хабарлайды Алтайньюс тілшісі.

Ойын алаңы Сарыөлең ауылында кәсіпкер Ержан Қойлыбаевтың демеушілігімен салынған.

Салтанатты шараға аудан әкімі Дулат Қажанов, ауылдық округтің депутаты Н.Қасымханов, қоғамдық ұйым өкілдері, ауыл тұрғындары мен жастар қатысты. Салтанатты шарада  аудан әкімі Дулат Қажанов ауыл тұрғындары атынан ел игілігіне  атқарған жұмысы үшін  Ержан Қойлыбаевқа   алғыс айтып, жасаған ізгі ісін елді-мекенге жасалған тартуы деп бағалады.

Жаңа футбол алаңындағы алғашқы ойынға доп қосу құрметіне аудан әкімі Д.Қажанов ие болып, спорт сүйер қауым ойынды бастады.