Қазақстанның ауыр атлетика федерациясы «Жас қуат» деп аталатын бағдарламаны іске қосты. Аталмыш бағдарлама аясында ел аумағында ондаған ауыр атлетика залы ашылып, ескі жаттығу залдары жөндеуден өтпек.
Arnapress.kz сайты хабарлағандай, дәл осындай залдың екеуі Семей қаласында орналаспақ. Таяуда аталмыш нысандардың ашылу рәсімі өтіп, оған республикалық ауыр атлетика федерациясының атқарушы директоры Алдияр Нұрәлинов арнайы келіп қатысты.

– Семейде екі зал ашуды ұйғардық. Оның бірі «Локомотив» стадионында, ал екіншісі қаладағы №32 мектепте орналасқан. Жалпы, аталмыш бағдарлама аймақтардағы жас атлеттерге қолдау көрсету мақсатында жүзеге асырылуда екенін айтқым келеді. Бағдарламаның тағы бір ерекшелігі – болашағынан зор үміт күттіретін жастарға бір жыл бойы арнайы стипендия төленетін болады. Сіздердің облыстарыңыздан мұндай стипендияға бес спортшы ие болды, – деп хабарлады А.Нұрәлинов.