Катонқарағай ауданының тұрғыны сібір жарасын жұқтырған болуы мүмкін. Науқас ауруханаға жатқызылды, деп хабарлайды Алтайньюс тілшісі.

– Кішінарын ауылының 60 жастағы тұрғыны аудандық аурухананың жұқпалы аурулар бөліміне жатқызылды. Дәрігерлер білегінде жұқпалы жара бар (инфицированная рана кисти) деген диагноз қойып отыр. Науқас үйінде мал ұстайтындықтан қосымша қан талдауын тапсырды. Сібір жарасын жұқтырған-жұқтырмағаны осындай кейін анықталмақ. Талдаулар аса қауіпті жұқпалы аурулар зертханасына жіберілді, – деп мәлімдеді облыстық Денсаулық сақтау басқармасының баспасөз қызметі.

Өткен күзде дәл осы ауылдың тұрғыны мал сойып жатып сібір жарасын жұқтырып, қайтыс болған еді. 

Науқасты емдеу жолдарын анықтау үшін облыс орталығынан ауданға мамандар жіберілген болатын. Әзірше дәрігерлер «Сібір жарасының теріде болатын түрі» деген қорытындыға келіп отыр.

Қазіргі уақытта науқастың және үй ішіндегілердің (отбасында 3 адам) денсаулығы қалыпты, медициналық бақылауда. Бірақ талдау нәтижелері оң болмай шықты. Енді тереңдетілген зертханалық тергеу жұмыстары жүріп жатыр.

– Эпидемиологиялық тексеру және тергеу барысында үй жануарларынан ешқандай ауру анықталмады. Қазір мамандар тұрғындармен сөйлесіп, оларды құлақдар етіп, сібір жарасының алдын алу жұмыстары жүргізіп жатыр, – дейді Денсаулықсақтау басқармасы.