Қазақстанда балаларға арналған SIM-карта енгізу ұсынылды
Фото: ашық дереккөз
Еліміздегі оқу-ағарту вице-министрі Еділ Оспан ата-аналардың бақылауында болатын балаларға арнап SIM карта енгізу идеясы туралы айтты.
Бала интернетке қосылған жағдайда ата-аналарының телефондарына хабарлама түсіп, автоматты түрде ата-анасынан рұқсат сұралады, деп хабарлайды Altaynews тілшісі.
– Біз бұл жүйені енгізу арқылы балаларды бақылай аламыз. Олар қандай сайттарға кіреді, қандай әлеуметтік желілерде отырады, қандай ақпараттарды көреді, соның бәрін бақылауға мүмкіндік бар. Тағы бір мәселе – біз уақытты шектей аламыз. Түнде бала интернетте көп отырады. Экран уақытын шектеу қажет. Мұның бәрін біз ұсына аламыз. Бұл – мәселенің техникалық бөлігі. Біз балалардың қауіпсіздігін қамтамасыз ететін Білім министрлігі ретінде осыны ұсынамыз, – деді Еділ Оспан.
Бірақ әзірге бұл идея министрлік өзекті деп санайтын ұсыныс деңгейінде тұр.
– Мектеп жасындағы балалары бар адамдар қолдау көрсетеді деп ойлаймын. Біз балаларымыздың денсаулығы үшін және, жалпы, ата-ана тәрбиесі үшін қауіпсіз "ақ" сайттарда отыруына қол жеткізуіміз керек. Біз мұны тиісті мемлекеттік органдармен талқылауымыз керек. Содан кейін біз ұсынамыз. Менің ойымша, бұл заңның нормасы болуы керек, – деді Еділ Сабырұлы.
Бұдан бұрын TikTok балалар мен жасөспірімдерге арналған қызметті пайдалану уақытын шектеуге шешім қабылдағаны белгілі болды. Алдағы апталарда 18 жасқа толмаған пайдаланушыға тиесілі әрбір есептік жазба үшін күніне 60 минуттық шектеу автоматты түрде орнатылмақ.
Оқи отырыңыз
