Қ.Тоқаев Қазақстанда аймақтық климаттық саммит өткізуді ұсынды
Сурет: Ақорданың баспасөз қызметі
Мемлекет басшысы Қасым-Жомарт Тоқаев Астана халықаралық форумында Қазақстанда аймақтық климаттық саммит өткізуді ұсынды, деп хабарлайды Altaynews тілшісі Ақорда сайтына сілтеме жасап.
"Орталық Азия – су қауіпсіздігін сақтау тығыз әріптестік және бірлескен тиімді шараларды жүзеге асыру арқылы ғана шешілетін аймақ. Аймақтағы климат және өзге де мәселелерді талқылау үшін Алматыда Орталық Азия елдерінің жобалық кеңсесін құруды және БҰҰ секілді халықаралық ұйымдарды тарта отырып, 2026 жылы Қазақстанда аймақтық климаттық саммит өткізуді ұсынамын," – деді Президент.
Сондай-ақ экологиялық апаттың алдын алу үшін халықаралық Аралды қорғау қорын қолдауға көбірек қаржы бөлуге шақырды.
"Аймақтағы екі үлкен өзен Сырдария мен Әмудариядағы су деңгейі 2050 жылға қарай 15 пайызға түседі. Біз аймақтағы экологиялық апаттың алдын алу үшін халықаралық Аралды қорғау қорын қолдауға көбірек қаржы бөлуге шақырамыз. Еліміз "жасыл" экономиканың мол мүмкіндіктерін ұсынып, қайта қалпына келтірілетін энергетиканың орталығы атана алар еді. Алайда уақыт біздің жағымызда емес. Көмірді аз тұтыну және "жасыл" экономикаға қажетті жылдамдықпен көшу үшін бізге ресурстар мен серіктестік байланыс қажет", – деді Мемлекет басшысы.
