Газа секторынан эвакуацияланған қазақстандықтар мінген ұшақ бүгін Алматыға қонды.

ҚР президенті Қасым-Жомарт Тоқаевтың тапсырмасына сәйкес ҚР Сыртқы істер министрлігі Газа секторындағы қазақстандықтарды эвакуациялады, деп хабарлайды Altaynews.kz тілшісі Zakon.kz сайтына сілтеме жасап.

ҚР СІМ таратқан мәлімет бойынша, бүгін, яғни 2023 жылғы 17 қараша күні арнайы эвакуациялық бортпен 99 жолаушы – Қазақстан азаматтары мен олардың отбасы мүшелері Алматы қаласына аман-есен ұшып келді.

Министрлік сәтті іске асырылған эвакуациялау Қазақстанның Израильдегі, Иорданиядағы және Мысырдағы Елшіліктерінің осы елдердің уәкілетті органдарымен және халықаралық ұйымдармен бірлескен үйлесімді жұмысының нәтижесі екенін атап өтті.

Қазақстандық дипломаттар қақтығыс аймағында қалып қойған Қазақстан азаматтарына көмек көрсету және эвакуациялық іс-шараларды ұйымдастыру жөніндегі жұмысты жалғастырады.