Жаңа жыл мерекесі қарсаңында Алтай ауданындағы балалар мен жасөспірімдер спорт мектебінің тәрбиеленушілері ерекше сыйлыққа ие болды. Бүгін бір топ алтайлық жас хоккейші «Казцинк» компаниясы тарту еткен сужаңа спорттық форма мен хоккейші үшін аса қажет өзге де керек-жарақтарға қол жеткізіп, бір қуанып қалды.

Жаңа форманы табыстау рәсімі Өскемендегі Борис Александров атындағы спорт сарайында өтті. Алтай ауданынан арнайы ат арытып келген хоккей командасын «Казцинк» компаниясының әкімшілік мәселелер жөніндегі атқарушы директоры Андрей Лазарев құттықтады,деп хабарлайды Altaynews.kz тілшісі.

Айта кетейік, бұл күні 30-ға жуық жаңа спорттық формаға қол жеткізген Алтай қаласының жас хоккейшілері облыс орталығындағы Спорт сарайының мұз айдынында өскемендік құрдастарымен шеберлік байқасуға да мүмкіндік алды. Жаңа жыл алдында осындай тосынсыйларға ие болған жас алтайлықтар қуаныштарын жасыра алмады.

Алтай қаласындағы балалар мен жасөспірімдер спорт мектебінің директоры Мұрат Байболовтың айтуынша, бүгінде 2016 жылы ашылған хоккей модулінде 150-ге жуық балақай жаттығуда. Олардың арасында хоккейшілерден бөлек, мәнерлеп сырғанаушылар, конькимен жүгірушілер мен шорт-трекшілер, керлингшілер де бар.

Нұржан Кенжеұлы