Қазақстандықтарды жаңа 2024 жылмен құттықтаған Мемлекет басшысы Қасым-Жомарт Тоқаев сонымен қатар Жаңа жыл қарсаңында жұмыс істеп жатқан адамдарға арнайы құттықтауын жолдады. «Сіздер елімізге адал қызмет етіп жүрсіздер. Мен баршаңызға шынайы ризашылығымды білдіремін,» - деді Президент.

Осы ретте ШҚО өрт сөндірушілерінің еңбегін атап өткен жөн. Облыста Жаңа жыл түнінде азаматтардың қауіпсіздігін қамтамасыз ету үшін жеке құрамның 331 адамы мен ТЖД-ның 132 техникасы кезекшілік атқарды, деп хабарлайды Altaynews.kz тілшісі.

ШҚО ТЖД баспасөз қызметінің хабарлауынша, Жаңа жыл қарсаңында олар 4 өртті сөндіріп, 14 тұрғынды эвакуациялады.

1 қаңтар күні сағат 00.00 шамасында Глубокое ауданының Тарханка ауылында, Иванов көшесінде жеке тұрғын үйдің ауласында көмір сақтау үй-жайы өртенді. Өрт сөндірушілер 67 шаршы метр алаңды шарпыған жалынды сөндірді. Алдын ала болжам бойынша өрттің шығуына адамдардың абайсыз әрекеті себеп болған. Сөндіруге 15 өрт сөндіруші мен 3 техника жұмылдырылды.

Өскемен қаласындағы Енисей көшесінің бойында 4 шаршы метр алаңда шаруашылық құрылысының ағаш конструкциялары өртенді. Өрт себебі – отпен абайсыз болу.

Глубокое ауданы, Опытное поле кенті, Солнечная көшесінде жеке тұрғын үйдің ауласында монша мен көмір сақтайтын үй-жай өртенді. Өрт сөндірушілер жалынды тежеді. Өрт себебі – пешті пайдалану кезінде қауіпсіздік талаптарын сақтамау.

1 қаңтар күні сағат 02:25-те Алтай ауданы, Жаңа Бұқтырма кентінде 5 қабатты үйдің екінші қабатында орналасқан пәтердегі жиһаз өртенді. Өрт сөндірушілер қауіпті аймақтан 14 тұрғынды эвакуациялады. Өрттің алдын ала себептері – электр жабдықтарын пайдалану кезінде қауіпсіздік талаптарын сақтамау не болмаса төсекте темекі шегу.