ШҚО полицейлері 30 жеңіл автокөлік пен ішінде кеншілері бар 4 автобустан тұратын автоколоннаны алып жүрді. Олар қарлы боранда жол бойына жиналған автоколоннаны қауіпсіз жерге дейін жеткізді.

ШҚО-да бір аптадан бері ауа райы қолайсыздық танытып тұр. Осыған байланысты патрульдік полиция қызметкерлері күшейтілген режимде қызмет атқаруда. Республикалық және облыстық маңызы бар жолдарда қосымша экипаждар енгізіліп, полицейлер бірнеше рет автоколоннналарды  қажетті елді мекендеріне дейін  алып жүрді, деп хабарлайды Altainews.kz тілшісі.

Мысалы, бүгін «Өскемен-Риддер» тас жолында патрульдік полиция қызметкерлері автожолда үш сағаттан астам тұрған 30 жеңіл автокөлік пен 4 автобусты алып жүрді.

– «Полиция қызметкерлеріне кеншілерді жұмысқа дейін алып жүргені үшін алғыс білдіргім келеді», – деп атап өтті жүргізушілердің бірі.

Қазіргі уақытта ауарайының қолайсыздығына байланысты бірнеше автожолдар жабық. Тәртіп сақшылары жүргізушілерден жолдардың жабылғаны туралы хабарламаларды елеп ескеруді және елді мекендерден тыс жерлерге шықпауды сұрайды.