– Қазір су шаруашылығы мамандарын даярлайтын жеке институт ашу мәселесі қарастырылуда. Ол оқу орны Тараз қаласында орналасатын болады. Сол сияқты, біз Ташкенттегі ирригация және ауыл шаруашылығын механикаландыру инженерлері институтымен қазақстандық студенттерді оқыту жөнінде келісімшарт жасастық. Бұл университеттің филиалдары Алматы мен Тараз қалаларында ашылатын болады. Білуімше, су шаруашылығы мамандарын даярлайтын жоғары оқу орны Шығыс Қазақстанда да бар. Алайда, дәл қазір бізге орта буын мамандары қажет. Ал ол үшін колледждермен жұмыс жүргізуге тиіспіз. Осы мәселені шешу үшін еліміздің бірқатар өңіріндегі колледждерде сала мамандарын даярлайтын білім беру бағдарламаларын ашуды жоспарлап отырмыз, – деген министр оның бірі Өскеменде ашылуы мүмкін екенін де жоққа шығармады.