32 талапкер смартфон мен шпаргалканың кесірінен тест тапсыра алмай қалды
Фото: Ұлттық Тестілеу орталығы
Негізгі ҰБТ басталғаннан бері 30 мыңнан астам адам тест тапсырды. Оның ішінде талапкерлердің 69%-ы қазақ тілінде, 31%-ы орыс тілінде, 40 адам ағылшын тілінде тестілеуден өтті, деп хабарлайды Altainews.kz тілшісі.
ҰБТ басталғалы шекті балды 71% талапкер жинады. Орташа балл 64 балды құрады. Ең жоғары балл – 136.
16 мамырда басталған осы жылғы негізгі ҰБТ-ның бірінші аптасы аяқталды.
Естеріңізге сала кетсек, тестілеуге қатысуға 186 мың талапкерден 342 мыңға жуық өтініш келіп түсті.
Қазіргі таңда тестке қатысушылардың басым бөлігі, атап айтқанда, 20%-ы «Шығармашылық емтихан», 18%-ы «Математика-Физика» пәндер комбинациясын тапсырды. 11%-ы «Математика-Информатика» комбинациясын таңдаған. Ең аз таңдалған комбинация – «Химия-Физика», оны 45 түлек тапсырған.
Ерекше білім беру қажеттіліктері бар оқуға түсушілер үшін қолайлы жағдай жасаудың арқасында ҰБТ-ның бірінші аптасында 102 талапкер қатысты.