Ойын бизнесін ұйымдастырған қазақстандық азамат БАӘ елінде ұсталды
pexels.com
Күдікті Атырау облысында букмекерлік кеңсе түріндегі заңсыз ойын бизнесін ашып, халықтың 21 млн теңгесін жымқырған.
Артынша заң қызметкерлерінен жасырынып, шетел асқан, деп хабарлайды Altainews.kz сайты ҚР Бас прокуратурасының ақпаратына сүйеніп.
Бас прокуратура мен Қаржы мониторингі агенттігінің қызметкерлері Біріккен Араб Әмірліктерінен заңсыз ойын бизнесін ұйымдастырғаны үшін қылмыстық жауапкершілікке тарту үшін Қазақстан азаматын экстрадициялады.
– Күдікті 2023-2024 жылдар аралығында Атырау облысында букмекерлік кеңсе түріндегі заңсыз ойын бизнесін ұйымдастырып, нәтижесінде 21 млн теңге көлемінде пайда тапқан, – делінген прокуратураның ақпаратында. – Қылмыс жасағаннан кейін күдікті жасырынып, халықаралық іздеу жарияланды. Ағымдағы жылдың тамыз айында ол Абу-Даби қаласының аумағында ұсталып, кейін Қазақстан Республикасына экстрадицияланды. Қазіргі уақытта күдікті Астана қаласының тергеу изоляторына қамалды.
Айта кетері, ол бұрын осындай қылмыс жасағаны үшін сотталған екен.
Күдіктінің кінәсі дәлелденсе, қылмыс жасағаны үшін мүлкі тәркіленіп, 4 жылдан 7 жылға дейінгі мерзімге бас бостандығынан айыру жазасы қарастырылған.
Оқи отырыңыз
