Ақтау гарнизонындағы сарбазға оқ тиіп, қайтыс болды
t.me/modgovkz
Маңғыстау облысында полигондағы оқу-жаттығу кезінде сарбаздың бетіне оқ тиіп, қаза тапты, деп хабарлайды Altainews.kz сайты.
Бұқаралық ақпарат құралдарының хабарлауынша, кеше сағат 17.10 шамасында лагерь бойынша кезекші гвардия лейтенанты ПМ 9 мм тапаншасынан рұқсатсыз оқ атып, гвардия сарбазы, қатардағы жауынгердің бетіне тиген.
Артынша қаза тапқан сарбаздың әкесі Қорғаныс министрлігі басшысына видеоүндеу жасады. Ол оқиғаның жан-жақты тергелуін талап етіп отыр және мұның оқыс жайт екеніне сенбейтінін айтқан.
- Іс Қорғаныс министрінің ерекше бақылауына алынды. Оның тапсырмасы бойынша Қорғаныс министрінің орынбасары генерал-майор Ш-Х. Жазықбаевтың басшылығымен арнайы комиссия құрылды. Қайғылы жағдайдың мән-жайлары жан-жақты тексеріліп, тергеу органдарына объективті тергеу жүргізу үшін толық көмек көрсетілу үстінде, - деп хабарлады ҚР Қорғаныс министрлігінің баспасөз қызметі. - Кінәлі тұлғалар ҚР Қылмыстық кодексіне сәйкес қатаң жауапкершілікке тартылады.
ҚР Қорғаныс министрлігінің басшылығы қаза тапқан әскери қызметшінің отбасы мен туыстарына қайғыра көңіл айтады. Сондай-ақ сарбаздың туыстары мен жақындарына жан-жақты көмек көрсетілетінін хабарлайды.
Оқи отырыңыз
