Жаздың басталуына орай Өскемендегі балабақшалардың бірқатары жөндеу жұмыстарына жабылады. Жұмыс басты ата-аналар мұндай жағдайда не істейді?

Қалалық білім бөлімінің хабарлауынша, мемлекеттік-жекеменшік серіктестікке негізделген балабақшалар барлық маусымда жұмыс істей берсе, мемлекеттік мекемелер – шілде айы басталғанға дейін ашық болады. Бұл тізімге жаз басталған күннен бастап жөндеу жұмыстарына жабылатын балабақшалар кірмейді.

Жабылған балабақшалардағы бүлдіршіндер сол маңдағы мемлекеттік немесе жекеменшік балабақшаларға орналастырылады. Сонымен қатар, мемлекеттік балабақшалардың кейбіреуінде маусым, шілде айларында кезекші топтар ашылады.

Жаз мерзімінде жұмыс істейтін кезекші балабақшаға баланы тіркеу үшін директордың атына өтініш жазу керек. Ол үшін ата-аналары өз балабақшаларынан баланың денсаулық паспорты мен оның даму картасын алып келуге тиіс.

Барлық сұрақтар бойынша қалалық білім бөліміне хабарласуға болады. Байланыс телефоны: 70-00-24.