Өскеменде ерлер арасында допты хоккейден Қазақстан Республикасы кубогіне арналған турнир басталды (Видео)
Бүгін облыс орталығында ерлер арасында допты хоккейден Қазақстан Республикасы кубогіне арналған турнир басталды. Турнирдің алғашқы күнінде шығысқазақстандықтар жеңіске жетті, деп хабарлайды Altainews.kz тілшісі.
Бұл күні «Шығыс» командасы 13:3 есебімен алға шықты.
«ШҚО-дан бес команда қатысуда. Сонымен қатар Алматы, Батыс Қазақстан облыстары мен Астана қаласынан, сондай-ақ Ұлан ауданының командалары да бақ сынауға келді. Бүгін «Шығыс» (ШҚО) пен «Барыс» (Алматы облысының) командалары кездесіп, өзара мықтыны анықтады. Бұдан кейін Батыс Қазақстан мен Астана командалары мұз айдынында кездесті», – деді ұйымдастырушы Евгений Медведев.
Мамандардың айтуынша, «Шығыс» командасының хоккейшілері үздік ойын көрсетті. Бұл команданың ойыншылары да ойын нәтижесіне қанағаттанды.
«Бірінші ойында жылдамдық пен шапшаңдық жағынан мықты болғанымыз байқалды. Жалпы, ойын тартысты өтеді деп сенемін. Қарсылас командаға алғыс білдіремін. Жігіттердің өз ісінің шебері екені көрініп тұр», – деді ШҚО командасының шабуылшысы Антон Свешников.
ШҚО командасы ойыншысының айтуынша, алдағы уақытта өте тартысты ойындар күтілуде.
Айта кетейік, ерлер арасындағы допты хоккейден Қазақстан Республикасы кубогіне арналған турнир 13 қарашаға дейін жалғасады. Барлық ойындар Қ. Сәтпаев көшесі, 26/2 мекенжайындағы мұз айдынында өтуде.
