Жарма ауданында көктемгі су тасқынының алдын алу мақсатында барлық ауылдық округте кезекшілік ұйымдастырылып, су басу қаупі бар елді мекендердің картасы жасалған. Сондай-ақ аудандық төтенше жағдайлар бөлімінің мамандары Жармадағы Кеңтарлау, Қаратөбе, Жаңаөзен ауылдары мен Шар су қоймасын бақылауда ұстап отырғанын айта кеткен жөн.

– Ақпан айынан бастап аудандағы 408 су құбыры мен 52 көпір еріген қар суынан тазартылды. Бұдан бөлек бөгеттерді нығайту жұмыстары жүргізілді. Оған «ДЭУ-28», «Жарма тас жолы», «Жарма-Су», «Горводхоз» сияқты мекемелер тартылды. Қазір Жарма ауданындағы Шар, Ортабұлақ, Қарағанды, Байкал, Қызылсу, Ақтайлақ сияқты алты су қоймасының жағдайы тұрақты, - дейді аудан әкімі Нұрлан Сыдықов.