Жуырда «Аягөз ауданының Құрметті азаматы», «Ы. Алтынсарин атындағы медальдің» иегері байырғы ұстаз Балғын Молдахановтың жүлдесіне арналған баскетбол жарысы № 1 жалпы білім беретін орта мектепте өтті. Жарысты мектептің әкімшілігі, ұжымы бірлесіп өткізгенін айта кеткен ләзім.

Ашылу салтанатында аудандық білім бөлімінің басшысы Н. Әзімбаев, аудандық мәслихат хатшысы С.Ысқақов қатысушыларды құттықтап, Б. Молдахановқа алғыстарын білдірді. Мәжіліс залында мектептің жас өнерпаздары Б. Молдаханұлы туралы әдеби монтаждық көрсетілімін көрермендер назарына ұсынды. Шараға келген мектеп директорлары, туыстары, әріптестері мерейтойымен құттықтап,денсаулық, отбасына ақ тілектерін аямады. Осындай іс – шараны ұйымдастырған мектеп директоры М. Жақыпбекова бастаған ұжымға қонақтар ризашылығын білдірді.

Жалпы, жарысқа ауданымыздың 12 орта мектептерінің командалары қатысты. Командалар жеребе арқылы 3 топқа бөлініп, сайысты. Шиеленісті ойындардан соң мықтылар анықталды. № 4 орта мектебі І орынды,ІІ орынды № 1 орта мектебінің командасы, көпсалалы қазақ мектеп - гимназия командасы ІІІ орынды иеленді.

Жарыс соңында жеңімпаздар мен жүлдегерлер, әр ойын шебінде үздік ойын көрсеткен ойыншылар аудандық білім бөлімінің мақтау қағаздарымен және Б. Молдахановтың демеушілігімен алынған арнайы кубоктармен, бағалы сыйлықтарымен, медальдармен марапатталды.