6-маусымда А.С.Пушкин атындағы облыстық кітапханада орыс әдебиетінде ерекше орын алатын ұлы ақын Александр Сергеевич Пушкиннің туған күніне арналған мереке ұйымдастырылады, деп хабарлайды Altaynews.kz тілшісі .

Бағдарлама ақын ескерткішіне гүл шоғын қоюдан басталмақ. Одан кейін әдебиетті сүйер қауым «Сіз Пушкинді білесіз бе?» көңілді интеллектуалды ойынына қатысып, блиц-турнир тәртібінде А.С.Пушкин өмірбаянына қатысты сауалдарға жауап береді, өлеңдерінен үзінді оқып, қаламгер шығармалары кейіпкерлерімен толығырақ танысуға мүмкіндік алады.

Оқырмандар Абай мен Пушкин арасындағы ізгі сабақтастықты «Пушкин және Абай» кітап көрмесінен тамашалайды. Аталған көрменің виртуалды нұсқасы да қызмет көрсетеді (http://www.pushkinlibrary.kz/vyst/Abai_Pushkin_kaz/index.html). Бұл жерде «Евгений Онегинді» түпнұсқада және Абайдың аудармасында оқып, пушкинтанушы, абайтанушылар ізденістерімен, екі ұлы тұлғаның рухани әрі шығармашылық үндестігімен танысуға болады.

«Ертегілер әлемінде» викторинасы да Пушкин ертегілеріне үңілуге мүмкіндік береді. Оның лирикалық әрі танымдық, көңілді де парасатты ертегілері бізге балалық шақтан-ақ таныс. Олардың әрбіреуі махаббат пен әділдікке меңзеп, әрқашан жақсылық жамандықты жеңіп, адамның жақсы қасиеттерін ашып көрсетеді.

Александр Сергеевич тек көрнекті әдебиетші ғана емес, сонымен бірге, нағыз сатирик. Тумасынан тапқыр әрі өжет болған бала ақын қалжыңдасуды да ұнатқан. Оның әйгілі эпиграммалары барлық қала шаһарына аян болған. «Көңілді Пушкин» әдеби монологы ақынның әзіл-сықағы мен көңілді шақтарынан сыр шертетін болады.