Шығыс Қазақстанда коронавирустық инфекцияны емдеу үшін covid-19-дан айыққан адамдардың плазмасы қолданылады.
Бұл туралы орталық коммуникациялар қызметінің брифингінде ШҚО әкімінің орынбасары Шәкәрім Бұқтұғұтов мәлімдеді. Естеріңізге сала кетейік, Шығыс Қазақстан облыстық қан орталығы коронавируспен ауыратын науқастарды емдеу үшін елімізде бірінші болып иммундық плазманы дайындай бастады. Сол кезде, КВИ аурушаңдығының өршуін күтіп, аймақ басшысы Даниал Ахметов иммундық плазма банкін құруды тапсырды. Облыстың қан орталықтары донорларды іріктеу, плазма жинау жұмыстарына кірісті.
Шәкәрім Бұқтұғұтовтың мәліметі бойынша, қанның әртүрлі топтарындағы плазманың 6 639 дозасы дайындалды. Облыстың медициналық мекемелерімен өзара әрекеттесудің нақты механизмі нәтижесінде иммундық плазма тұрақты негізде ауруханаларға жіберіледі. Бүгінде 1 846 доза плазма құйылды. Ол облыстың 953 тұрғынына коронавируспен күресуге көмектесті.