Қазіргі кезде «Жібек жолы» туристік пойызы Алматыдан Түркістан, Отырар, Самарқан, Бұхара және Ташкент бағытында қатынайды. Алдағы уақытта оның бағыты кеңейіп, Өскеменнен де жүре бастау ықтималдығы айтылды, деп хабарлайды Altainews.kz тілшісі.

Өскеменде Өзбекстан Республикасының туристік әлеуетін таныстыру шарасы өтті. Жиынға арнайы келген Өзбекстанның Қазақстандағы Төтенше және Өкілетті Елшісі Бахтиер Ибрагимов екі ел арасындағы байланыстардың нығая түскенін атап өтті.

Презентация барысында өзбекстандық делегация туристер үшін ең танымал бағыттарды, медициналық туризмнің мүмкіндіктерін, жыл бойғы демалыс түрлерін және көрнекті орындарды таныстырды. Айта кетейік, жыл сайын Қазақстаннан миллиондаған турист Өзбекстанға барады. Екі ел арасында тұрақты әуе қатынасы да бар.

ШҚО туризм басқармасы басшысының міндетін атқарушы Тимур Жігітаевтың айтуынша, бұл шараға аймақтың туристік компаниялары да шақырылды.

Шара соңында туроператорлар мен делегация мүшелері бейресми жағдайда пікір алмасып, байланыс орнатуға мүмкіндік алды.

Жиында қатысушыларды ерекше қызықтырған тақырыптардың бірі – «Жібек жолы» пойызы бағытының кеңейтілуі болды. Қазір ол Алматыдан Түркістан мен Өзбекстанның бірнеше қаласына барады. Бірақ алдағы уақытта оның Өскеменнен де жүруі мүмкін.

Сонымен қатар, елші Өзбекстан Қазақстанмен тек туризмді ғана емес, экономикалық байланыстарды да тереңдете түсуге мүдделі екенін атап өтті. Өзара тауар айналымын арттырып, басқа да салаларда ынтымақтастықты дамытуға дайын екенін білдірді.

Фото: Екатерина Семина
Видео: Жалғас Сакадиев