Қазақстанда сауда нарықтарын жаңғырту жұмыстары жалғасуда. Бүгінде ел бойынша 46 сауда нысанында күрделі жөндеу және жаңғырту жүріп жатса, олардың қатарында Өскемен қаласындағы «Заря» мен «Заречный» базарлары да бар, деп хабарлайды Altainews.kz тілшісі ҚР Сауда және интеграция министрлігіне сілтеме жасап.

Сауда комитетінің төрағасы Айдар Әбілдабековтің айтуынша, биыл наурыздан маусым айына дейін Комитет өкілдері әкімдіктермен, мемлекеттік органдармен және кәсіпкерлермен бірлесе отырып, елдің барлық өңірлеріндегі базарларға барып, «Жол картасына» енген нысандарды аралап, өзекті мәселелер мен оларды шешу жолдарын талқылаған.

Оның сөзінше, Комитетке кәсіпкерлерден техникалық құжаттарды келісу мерзімінің ұзаққа созылуына қатысты көптеген шағымдар келіп түсіп жатыр. Соның негізінде әкімдіктерге техникалық шарттар мен рұқсаттарды алу рәсімін жеделдету және базар иелерімен түсіндіру жұмыстарын күшейту жөнінде ұсыныстар жолданған.

Министр Арман Шаққалиев те өз мәлімдемесінде заңнама талаптарына сай келмейтін базарлар 2026 жылдан бастап жұмыс істей алмайтынын ескертті.

Арман Шаққалиев базарларды жаңғырту уақыт талабы екенін атап өтіп, бұл шаралар көлеңкелі экономиканы қысқартуға оң ықпал ететінін жеткізді. Мәселен, 2024 жылы базарлардағы хронометраж нәтижелері бойынша мемлекеттік бюджетке қосымша 1,3 миллиард теңге түскен.