Бүгін Үкімет отырысының қорытындысы бойынша өткен брифингте ҚР Премьер-Министрінің орынбасары Ермек Көшербаев Мемлекет басшысының туризм саласын дамыту жөніндегі тапсырмаларын орындау аясында жүргізілген инспекциялық сапар барысында туристердің, туристік бизнес өкілдерінің және жергілікті атқарушы органдардың пікірлері жиналғанын айтты, деп хабарлайды Altainews.kz тілшісі.

Оның айтуынша, бұл ақпараттың бәрі енді сарапталып, алдағы уақытта туризм саласындағы проблемалар мен құқық бұзушылықтарды жоюға арналған арнайы «Жол картасы» әзірленеді.

Вице-премьердің айтуынша, туристік аймақтардағы басты мәселе – инфрақұрылымның жоқтығы. Бұл тек жолдарға ғана емес, күнделікті қажеттілік болып саналатын кәріз жүйесі, су құбыры мен электрмен қамтуға да қатысты.

Сонымен қатар Ермек Көшербаев сапар барысында бақылау жүргізілген аймақтарда шенеуніктердің келгенін естіген бойда тазалық жұмыстарын жүргізіп, олардың кеткенінен кейін бұрынғы қалпына қайта оралған жағдайлар да тіркелгенін атап өтті.

Қазіргі таңда жұмыс тобы құрылып, барлық мәселе жүйеленіп жатыр. Жол картасында орталық және жергілікті атқарушы органдардың бірінші кезектегі атқаратын шаралары көрсетіледі. Бюджет шығынын қажет етпейтін, әкімдіктер мен министрліктердің міндеттеріне жататын мәселелер таяу уақытта шешімін табатын болады.

Андрей Дудник