2025 жылдың алғашқы жартысында ауыл шаруашылығы мақсатындағы жерлерді мемлекет меншігіне қайтару бойынша Шығыс Қазақстан облысында жоспар артығымен орындалды, деп хабарлайды АltaiNews.kz тілшісі ҚР Ауыл шаруашылығы министрлігіне сілтеме жасап.

Жоспарланған 51,57 мың гектардың орнына нақты 52,8 мың гектар пайдаланылмай жатқан ауыл шаруашылығы жері мемлекет меншігіне қайтарылды. Бұл – межеленген көлемнің 102,4 пайызы.

Министрлік мәліметінше, 2025 жылға облыс бойынша 120 мың гектар жерді қайтару мақсаты белгіленген. Бұл шара жер ресурстарын ұтымды пайдалану және пайдаланылмай жатқан немесе тиімсіз пайдаланылатын ауыл шаруашылығы алқаптарының көлемін азайту жөніндегі мемлекеттік саясатты іске асыру аясында жүргізілуде.

Жерлерді қайтару ісін ҚР Ауыл шаруашылығы министрлігіне қарасты Шығыс Қазақстан облысының Жер ресурстарын басқару департаменті аудандық әкімдіктер мен уәкілетті органдармен бірлесіп үйлестіруде.

Ауыл шаруашылығы мақсатындағы, бірақ мақсатына сай пайдаланылмай жатқан жерлерді анықтау, талдау және мемлекет меншігіне қайтару жұмыстары жүйелі түрде жалғасуда. Мониторинг аясында цифрлық құралдар мен қашықтан зондтау деректері белсенді түрде қолданылып, қабылданатын шешімдердің тиімділігі мен жеделдігін арттыруға ықпал етуде.

Дмитрий Чжан