— Бұл оқиғалардың барлығында ұқсас жайттар байқалады: ашық терезе, «қорғау құралы» ретінде қабылданатын, бірақ шын мәнінде қауіп төндіретін москит торы және ересектердің бір сәтке баладан көз жазып қалуы. Балалар өте белсенді әрі қызығушылығы жоғары. Бір ғана сәт – орны толмас қайғыға әкелуі мүмкін. Ашық терезе – баланың өміріне төнетін үлкен қауіп. Ал москит торы – қорған емес, керісінше өлімге апаратын тұзақ. Қайғылы жағдай орын алмас үшін дәл қазір үйдегі терезелердің қауіпсіздігін тексеріңіздер. Терезе алдындағы жиһазды алып тастаңыздар, арнайы балаларға арналған құлыптау құрылғыларын орнатыңыздар. Ең бастысы – баланы ашық терезесі бар бөлмеде жалғыз қалдырмаңыздар, тіпті бір минутқа да, – деп мәлімдеді ведомство өкілдері.