Шығыс Қазақстанда ауыл тұрғындары мемлекеттік «Ауыл аманаты» жеңілдетілген несиелеу бағдарламасының мүмкіндіктерін кеңінен пайдалануда. Соның айқын мысалдарының бірі – Глубокое ауданындағы кәсіпкер Амантай Танкаев. Ол жұбайымен бірге шаруашылығын дамытып қана қоймай, ет өнімдерін өңдейтін шағын цех ашып, қарапайым фермерлік істі заманауи талапқа сай деңгейге көтеріп отыр, деп хабарлайды Altainews.kz тілшісі.

Өткен жылы кәсіпкер 2,5% жылдық мөлшерлемемен жеңілдетілген несие рәсімдеді. 9 миллион теңге алып, оны қажетті құрал-жабдық алуға жұмсаған. Қазір «Танкаев» ЖК өнімдері тек аудан ішінде ғана емес, Өскемен қаласында да танымал. Кәсіпкердің айтуынша, тұрғындар жартылай дайын тағамдарды шетелге кетерде туған-туыстарына апару үшін де арнайы сатып алады.

Отбасылық бизнестің дамуына кәсіпкердің жары Эльмира Жұмабаева да үлкен үлес қосып келеді. Декреттік демалыста болса да, ол жолдасына қолдау көрсетіп жүр.

Бүгінде Танкаевтар отбасы мемлекет қолдауы болмаса, мұндай жобаны жүзеге асыру әлдеқайда қиын болар еді деп отыр. «Ауыл аманаты» бағдарламасы ауыл тұрғындарына мал шаруашылығын дамытып қана қоймай, жаңа өндірістер ашуға, жұмыс орындарын құруға және нарықты сапалы отандық өніммен қамтамасыз етуге мүмкіндік беруде.

Биыл бұл бағдарлама аясында тағы сегіз тұрғын өз кәсібін ашты. Екеуі ауыл шаруашылығы өндірістік кооперативін құрса, төртеуі жеке кәсіпкерлік ашқан. «Ауыл аманаты» бағдарламасын жүзеге асыру бойынша сенім білдірілген агент болып табылатын «Ертіс» ӘКК» АҚ баспасөз қызметі жыл соңына дейін бағдарламаның жалғасын қаржыландыру мәселесі қарастырылып жатқанын хабарлады.