Өскемен қаласының әкімі Алмат Ақышов Арматурный шағын ауданына барып, тұрғындармен кездесті. Жүздесуде мектептің жоқтығы, қаңғыбас иттер, жолдардың сапасы, жарықтандыру мен қоғамдық көлік қатынасы сынды өткір мәселелер көтерілді, деп хабарлайды Altainews.kz.

Кездесу «Дария» балабақшасында өтті. Тұрғындар әкімнің алдына бірінші кезекте мектеп тапшылығын шығарды. Қазір Арматурныйдағы 200-ден астам оқушы қаладағы 20 түрлі мектепке қатынап оқуға мәжбүр.

Әкімнің айтуынша, бірнеше жыл бұрын мектеп құрылысына қатысты шешім қабылдау құқығы жергілікті әкімдіктен алынып, білім басқармасына берілген.

Айта кетерлігі, мектепке арналған жер телімі бар, ол «Дария» балабақшасының жанында орналасқан. Негізгі түйткіл – қаржыландыру көзі мен жобаны жүзеге асыру тетігі.

Кездесуде тағы бір жиі көтерілетін мәселе – қаңғыбас иттер жайы қозғалды.

Оның айтуынша, жағдайды кейбір тұрғындардың саяжайдағы иттерін суық түскенде қараусыз қалдыруы ушықтырады. Осыған байланысты полицияға жеке секторда үй жануарларын ұстау ережелерін қатаң қадағалау тапсырылды.

Тұрғындар жолдардың шұрық-тесік күйіне де шағымданды. Әкімнің айтуынша, биыл алғаш рет күзгі жөндеу жұмыстары басталған, оған қаржы қарастырылып, Арматурный да жоспарға енгізіледі.

Көлік қатынасы да назардан тыс қалған жоқ. Халық 2023 жылы жолаушылар аз болғандықтан жабылған №229 автобус бағытын қайта ашуды және мектеп автобусының қозғалыс аясын кеңейтуді сұрады. Қазір автобус тек №19 мектепке дейін қатынайды, ал бір бөлігі оқитын №23 мектепке қатынау қиындау. Бұл ұсыныс әкімнің бақылауына алынды.

Сондай-ақ жарықтандыру мәселесі қозғалды. Алмат Ақышовтың айтуынша, қалада көше шамдары кезең-кезеңімен орнатылып жатыр.

Кездесу соңында қала басшысы тұрғындарды жеке қабылдап, жеке өтініш-тілектерін тыңдады.

 Елизавета Седых

Видео: Жалғас Сақадиев
Фото: Александр Шушеньков