Елімізде Балалардың әл-ауқаты индексі шеңберінде ауқымды әлеуметтік зерттеу жүргізілді. Оған балалар, ата-аналар және педагогтер қатысты, деп хабарлайды Altainews.kz тілшісі Оқу-ағарту министрлігіне сілтеме жасап.

Нәтижелерге сәйкес, балалардың құқықтық қорғалуының орташа деңгейі 90,3% болды. Бұл олардың өз құқықтары туралы жақсы хабардар екенін және қажетті тетіктерді қолдана алатынын көрсетеді. Ең жоғары көрсеткіш Қостанай (94,5%), Маңғыстау (93,5%) және Қызылорда (93,1%) облыстарында тіркелді.

Жасөспірімдердің өз өміріне қанағаттану деңгейі орташа есеппен 85% құрады. Бұл тұрғыда Қостанай облысы (90,1%), Шымкент (88,7%) және Қызылорда облысы (88,5%) көш бастады.

Отбасы ішіндегі сенім көрсеткіші де жоғары болды: жасөспірімдердің 90,4% ата-анасымен еркін сөйлесіп, ой-пікірін бөлісе алатынын айтты. Алдыңғы қатарда Ұлытау облысы (97,5%), Астана қаласы (95,3%) және Қостанай облысы (94,7%).

Айта кетейік, 2024 жылдың қорытындысы бойынша Қазақстанда Балалардың әл-ауқаты индексі тұрақты өсім көрсетіп, орташа республикалық көрсеткіш 58,6 балды құрады (өткен жылмен салыстырғанда +2,5 пункт).