Шығыс Қазақстан облысының энергетика саласында серпіліс күтілуде. «Altay Invest-2025» халықаралық форумында ШҚО әкімі Нұрымбет Сақтағанов пен «Global Turbo Compressors» ЖШС өкілдері Шемонаиха ауданындағы Үбі өзенінде екі жаңа гидроэлектростанция салу туралы келісімге келді. Жоба құны 200 млрд теңгеге бағаланып отыр. Бұл өңірде қосымша қуат көздері мен жаңа жұмыс орындарын ашпақ, деп хабарлайды Altainews.kz тілшісі.

Меморандумға қол қою форумдағы ең көп күтілген оқиғалардың бірі болды. Әңгіме жалпы қуаты 200 МВт болатын екі ГЭС салу жайында: олардың бірі – 150 МВт, екіншісі – 50 МВт. Бұл Шығыс Қазақстанның сырттан келетін электр энергиясына тәуелділігін азайтады. Компания өз тарапынан озық технология мен тәжірибе әкелуі ықтимал, ал әкімдік әкімшілік қолдау мен инфрақұрылымды қамтамасыз етеді. Жоба тек инвестиция тартып қана қоймай, болашақ энергетикалық бастамаларға тірек бола алады. Алайда жобалардың ұзаққа созылып кетпеуі үшін нақты қаржыландыру мен жүйелі басқарушылық шешімдер қажет.

Құжатқа қол қойылғаннан кейін тараптар жобалық-сметалық құжаттаманы әзірлеуге кіріседі. Үбі өзені алғашқы мегаваттарын алдағы жылдары бере бастайды деп күтілуде.

Дамир Омаров