Шығыс Қазақстан облысындағы Үбі өзенінде салынатын су электр станцияларының каскады Үкімет қаулысымен ерекше стратегиялық маңызы бар су шаруашылығы құрылыстарының тізіміне енді, деп хабарлайды Altainews.kz тілшісі Су ресурстары және ирригация министрлігіне сілтеме жасап.
Бұл жобаның басты мақсаты – өңірдегі су тасқыны қаупін азайту және елді мекендерді табиғи апаттардан қорғау. ГЭС-тер каскады тасқын суларды бақылауға мүмкіндік береді, сондай-ақ су ресурстарын тиімді басқаруға ықпал етеді.
Жоба аясында жалпы сыйымдылығы 500 миллион текше метрге дейінгі су қоймалары кешені салынады. Нәтижесінде ауыл шаруашылығына қажет 3 мың гектардан астам алқап суарылып, тұрғындар мен өндірістік кәсіпорындар сумен жабдықталады. Сонымен қатар станция қосымша экологиялық таза электр энергиясын өндіреді.

Бұл жоба Шығыс Қазақстандағы энергетикалық қауіпсіздікті нығайтып қана қоймай, табиғатты қорғау шараларына да оң әсерін тигізбек.