Шығыс Қазақстан облысында азаматтарды қолжетімді тұрғын үймен қамтамасыз етуге бағытталған «Бір қабатты Шығыс» өңірлік жобасы жалғасын табуда, деп хабарлайды Altainews.kz тілшісі.

Бағдарлама жайлы әрі қолжетімді баспанаға сұраныс жоғары аудан орталықтары мен ауылдық елді мекендерді қарқынды түрде жүзеге асуда. Облыстың құрылыс, сәулет және қала құрылысы басқармасының мәліметінше, 2025 жылы бөлінген қаржы аясында жалпы ауданы 26,2 мың шаршы метрді құрайтын 350 пәтер салу жоспарланған. Қазіргі таңда жұмыс кезең-кезеңімен атқарылуда, басымдық тұрғын үй кезегінде тұрған отбасыларға берілуде.

Катонқарағай ауданында жақында әлеуметтік осал топтар мен аз қамтылған көпбалалы жанұяларға арналған 12 пәтердің құрылысы аяқталды. Қазір мамандар соңғы рәсімдерді жүргізуде, ал дайын пәтерлерді мемлекет балансына алу қазан айының соңына жоспарланған.

Еске сала кетейік, Шығыс Қазақстан облысында бірнеше жыл бойы ауылдың келбетін өзгертуді және азаматтарды баспанамен қамтуды көздейтін кең ауқымды «Бір қабатты Шығыс» жобасы жүзеге асып келеді. Бұл жай ғана құрылыс емес – тұрғын үй мәселесін жүйелі түрде шешудің нақты үлгісі, әсіресе әлеуметтік тұрғыдан осал топтар үшін.

Жоба 2020 жылы облыс әкімдігінің бастамасымен басталған. Мақсаты – аз қамтылған және көпбалалы отбасыларды, жетім балалар мен әлеуметтік осал азаматтарды тұрғын үймен қамтамасыз ету. Бағдарламаның ерекшелігі – ол тек қалаларды ғана емес, аудан орталықтары мен ауылдарды да қамтиды.

Жобаның басты қағидасы қарапайым: жеке құрылыс компаниялары үйлер салады, кейін мемлекет оларды сатып алып, мұқтаж отбасыларға тапсырады. Бұл тәсіл мемлекет пен бизнестің күшін біріктіріп, құрылыс қарқынын арттыруға мүмкіндік беруде.

Бағдарлама іске қосылған алғашқы 2020–2022 аралығында облыста жалпы ауданы 50 мың шаршы метрден асатын 550-ден астам бір қабатты үй тұрғызылды. Көптеген аудандарда жаңа шағын ықшам аудандар пайда болып, ондаған отбасы өз баспанасына ие болды.

«Бір қабатты Шығыс» бүгінде ауылдық сәулеттің жаңару символына айналды. Қарапайым, бірақ заманауи үйлер мен инженерлік инфрақұрылым – ауыл халқына жайлы жағдай жасауға мүмкіндік туғызып отыр. Сонымен қатар, бағдарлама кадр тапшылығын азайтуға, мамандарды ауылдарға тартуға ықпал етуде. Өйткені тұрғын үй – адамның жұмыс пен өмір сүру орнын таңдаудағы шешуші факторлардың бірі.

Әрине, жоба барысында бірқатар қиындық та кездесті. Кей өңірлерде құрылыс мерзімі кешіктірілді, сапаға қатысты мәселелер туындады. Дегенмен, «Бір қабатты Шығыс» жүйелі жұмыстың арқасында халықтың тұрмыс сапасын нақты жақсарта алатынын өңірлік деңгейде дәлелдеді.

Дамир Омаров

Видео: ШҚО құрылыс, сәулет және қала құрылысы басқармасы

Instagram сілтеме