АҚШ-тағы ең беделді оқу орындарының бірі — Йель университетінің әйгілі «Sterling Memorial Library» кітапханасында қазақтың көрнекті ойшылдары мен жазушыларының еңбектерін салтанатты табыстау рәсімі өтті. Бұл игі шара Қазақстан мен Америка Құрама Штаттары арасындағы мәдени және білім беру байланыстарын жаңа деңгейге көтеруді мақсат етті, деп хабарлайды Altainews.kz.

Іс-шараға Йель университетінің Музыка кітапханасының директоры Рутанн МакТайр, тарихи жазбалар бөлімінің жетекшісі Марк Бейли, «Global Music Partnership» ұйымының негізін қалаушы Владимир Дё, қазақ диаспорасының өкілдері, ҚР Нью-Йорктегі Бас консулдығының қызметкерлері және Йельде білім алып жүрген қазақстандық студенттер қатысты.

Кітапхана қорына Абай Құнанбайұлының шығармалары, Шоқан Уәлихановтың таңдамалы зерттеулері мен заманауи қазақ прозасының бірқатар басылымдары тарту етілді. Бұл еңбектердің Йель сөрелеріне қойылуы — қазақ руханиятының әлемдік ғылым мен мәдениет кеңістігіне жаңа қадам басуының белгісі іспетті.

Йель университеті әлемдік білім ордалары арасында ерекше орны бар, оның кітапханалық қоры 15 миллионнан астам басылымды қамтиды. Сол алтын қордың арасынан қазақ ойшылдарының еңбектеріне орын берілуі — ұлттық рухтың халықаралық деңгейде мойындалуы, мәдени дипломатияның нақты көрінісі.

Кітаптар мен жазбалар университеттің ғылыми орталықтары мен зерттеушілеріне қолжетімді болады. Бұл қазақ әдебиеті мен тарихына, дала өркениетінің философиялық ой-санасына қызығушылық танытқан америкалық ғалымдар мен студенттер үшін тың мүмкіндік ашпақ. Абай мен Шоқанның еңбектері — адам мен қоғам, рух пен білім туралы мәңгілік сұрақтарға жауап іздеген дүниежүзілік ойшылдармен үндес туындылар.

Рәсім барысында қатысушылар қазақ мәдениетінің бай мұрасын, ұлттың ой-сана мен өнердегі даралығын ерекше атап өтті. Йель университеті өкілдері қазақ классиктерінің еңбектері Батыс оқырмандарына адамзаттық құндылықтарды жаңа қырынан тануға жол ашатынын жеткізді.

Іс-шара аясында қазақ классикалық музыкасының концерті де өтті. Бағдарлама «Global Music Partnership» ұйымының көркемдік жетекшісі Владимир Дё-нің бастамасымен, Йель университетінің профессорлық-оқытушылар құрамы мен студенттік қауымдастығының қолдауымен әзірленді. Концертте қазақтың ұлттық әуендері мен заманауи музыкалық өңдеулер үндесіп, тыңдарманды туған даланың кең тынысын сезіндірді.

Мұндай мәдени байланыстар — ұлт руханиятын әлемдік өркениетпен ұштастыратын алтын көпір. Абай мен Шоқан сынды тұлғалардың еңбектерінің Йель сөрелерінде сақталуы — тек мәдени сый емес, ұлттың рухани тәуелсіздігін, ой тереңдігін, сөз қадірін әлемге танытудың көрінісі.

Қазақ кітаптарының америкалық оқырманмен қауышуы — рухани тепе-теңдігін сақтайтын салмақты қадам. Себебі қазақтың сөз өнері мен тарихы адамзатқа ортақ құндылықтармен тоғысып, адам рухының биіктігін паш етеді.

Йель университетіндегі бұл символдық шара — екі елдің достығы мен өзара құрметінің айғағы. Ал қазақ руханиятының әлемдік ғылым ордаларына жол табуы — тәуелсіз елдің мәдени қуаты мен рухани әлеуетінің жарқын дәлелі.