Зайсан ауданындағы Дайыр ауылын жарық пен жылуға бөлеген «Шығыс мейірімі» – бір ғана оңалту орталығы емес, тағдыр сынағына түскен жандарға қайтадан сенім сыйлаған үлкен бір әлем. Мұнда аттың жүрісімен түзелген дене, мейіріммен толған көңіл, ұлттық дәстүрмен сабақтасқан тәрбие – бәрі бар. Бір кездері ескі ғимараттың орнына өмірдің жаңа тынысын алып келген осы шағын орталық бүгін жүздеген бала мен ересектің үмітін жалғап, Зайсанның өзі секілді кең құшағын айқара ашып тұр. Мирбану мен Тоқтарханның ауылға оралып, мейірім арқылы қоғамды өзгертуге деген талпынысы қазір тұтас өңірдің қуанышына айналды, деп хабарлайды Altainews.kz тілшісі.

Дайыр ауылының тұрғындары Тоқтархан мен Мирбану 2023 жылдың наурыз айында Үкіметтің қолдауымен ерекше қолдауға мұқтаж жандарға арналған «Шығыс мейірімі» атты қоғамдық қор құрып, жұмысын бастаған. Қазіргі күнде аяғына нық тұрып, жұмысын жолға қойған оңалту орталығы аудан тұрғындарына жоғары тыныс жолдарын тұзды бөлмеде емделу, фитотерапия, массаж, иппотерапия, табиғат аясында сейілдеу, әлеуметтік қызмет, паралимпиада және өзге де қызметтерді сапалы ұсынып келеді.

Оңалту орталығы төрт бағытта қызмет көрсетеді

Мирбану Исабекқызының жолдасы Тоқтархан Қайырбаев та орталықта жаттықтырушы мұғалім ретінде қолдау білдіріп келеді. Бокстан, көркем гимнастикадан еңбек сіңірген жаттықтырушы. «Шығыс мейірімі» екі жылдан бері аудандағы мүмкіндігі шектеулі жандарға төрт бағытта, атап айтсақ – арнаулы әлеуметтік көмек беру, паралимпиадаға дайындық, иппотерапия және этнотуризм бойынша қызмет көрсетеді. Сол үшін Қытайдан он екі қанат қазақ киіз үйін сатып әкеліп, этно ауыл да жасақтаған.

Қырықтан астам бала атпен серуендеп, ем алып жүр

Мәселен, орталық көрсететін арнаулы әлеуметтік қызметке келетін болсақ, ол алты бағытта жүргізіледі. Оның ішіне мәдениеттану, түркітану, медицина, психолог, логопед секілді адамның рухани да, физикалық дамуына да аса қажетті қызмет түрлері бар. «Шығыс мейірімінде» спортқа да баса мән берілген. Ерекше күтімдегі аудан тұрғындарын паралимпиадаға дайындау ісі мұнда жақсы жолға қойылған. Қазіргі уақытта аудан, облыс, республикалық жарыстарда жүлделі орын алған балалар, ересектер көп. Биыл жылына екі мәртеөтетін облыстық «Жұлдызай – 2025» инклюзивті ойындар жарысында балалар екінші орынға қол жеткізген. Былтырдан бері көрсетілетін қызметтер қатарын иппотерапия толықтырған. Иппотерапия облыста бұған дейін Глубокое ауданының Винное ауылында ғана жұмыс істеп келсе, енді Зайсан ауданында да ашылып отыр. 2024 жылдан мемлекеттік тапсырысты орындап келе жатқан орталықта қазіргі таңда 40-тан астам балалар тұрақты ем қабылдауда. Келушілердің барлығы да орталықтың арнайы көлігімен тасымалданады.

“Шығыс мейірімі” қоғамдық қорының күнделікті емшара жүргізу барысы қалыптасқан. Әр ем алушыға тағайындалған жеке емдеу процесі бар. Ем алушылардың жас ерекшеліктері мен диагноздерін ескере отырып, әртүрлі массаж, жаттығулар тағайындалады. Жаттығу арнайы дәрігерлердің бекітуімен, мамандардың бақылауымен, белгілі уақытпен жасалынады.

Ендігі мақсат – жатып емделуге жағдай туғызу

Қуантсаң, баланы қуант

Қыр баласы мен қала баласының арасында үзіліп қалған ұлттық дәстүр мен байланысты қайта жалғауды мақсат еткен орталықтың ем алушыларды Зайсанның көрікті табиғатына апару, аудан мұражайын аралату, өлке тарихымен таныстыру, облыс орталығы Өскеменде, өзге қалаларда өтетін жарыстарға қатыстыру жұмыстары жоспардағы негізгі шаралар қатарында.

Спорт саласындағы белсенді ерекше жандар мен балалар Көкшетаудағы әйгілі Бурабайға да саяхаттап қайтқан. Мекеменің жекеменшік жаңа шағын автобусы да бар. Оны биыл жеңілдетілген акциямен Шымкент қаласындағы автосалоннан сатып әкелген. Қор жетекшісінің айтуынша, автосалон басшылары Зайсандағы «Шығыс мейірімі» қоғамға тигізіп жатқан пайдасын білген соң, сөзге келместен, айтарлықтай жеңілдік жасап беріпті. Жаңа көлік ерекше қажеттіліктегі жандарды тасымалдауға және туризмді дамытуға үздіксіз қызмет етпек.

Дәурен Аллабергенұлы 

Фото: Мирбану Исабекқызының жеке архивінен