Шығыс Қазақстанда мұз айдындарындағы қауіпсіздік мәселесі күн тәртібіндегі өзекті мәселе. Әсіресе, қазір қараша айының суығында өзен-көлдердің бетін жұқа мұз жапқан кезеңде. Өңірдегі кей балықшылар мен тұрғындар мұздың әлсіздігіне қарамай, өз өмірлерін қатерге тігуде, деп хабарлайды Altainews.kz.

Ұлан ауданында құтқарушылар кезекті рейд барысында қауіпсіздік талаптарын бұзған бірнеше азаматты анықтады. Құтқару кеудешесінсіз, арнайы құрал-жабдықсыз жүрген төрт тұрғынға Қазақстан Республикасының «Әкімшілік құқық бұзушылық туралы» кодексінің 412-бабы бойынша жауапкершілік жүктелді.

Айта кету керек, облыс бойынша құтқару қызметі соңғы уақытта 150-ден астам профилактикалық рейд жүргізіп, халыққа түсіндіру жұмыстарын күшейтті. Құтқарушылардың айтуынша, мұз үстіндегі кей тұлғалардың бейқамдығы қайғылы жағдайларға әкелуі мүмкін.

Фото: ШҚО ТЖД