Алтай ауданында прокуратура, полиция, жергілікті атқарушы органдар мен нотариустар бірігіп, «Құқықтық қамқорлық» акциясы аясында тұрғындармен көшпелі кездесулер ұйымдастырды. Серебрянск, Алтай, Парыгино және Соловьёво елді мекендерін қамтыған шараның басты мақсаты – азаматтардың құқықтық сауаттылығын арттыру, мемлекеттік органдармен тиімді байланыс орнату және тұрғындардың өзекті мәселелеріне жедел жауап беру, деп хабарлайды Altainews.kz.

Кездесулер барысында мамандар заңнамадағы жаңалықтарды түсіндіріп, құқықтарды қорғау тетіктері мен мемлекеттік органдарға жүгіну тәртібі туралы толыққанды кеңестер берді. Әсіресе, әлеуметтік осал топтардың өтініштері назардан тыс қалған жоқ.

Алтай ауданының прокуроры Ержан Рыспаев мұндай форматтағы кездесулердің қоғаммен ашық диалог орнатуда ерекше рөл атқаратынын айтты.

Алтай ауданы полициясының бастығы Денис Еримбесов профилактикалық жұмыстың маңыздылығын атап өтті. Оның айтуынша, азаматтардың жеке қауіпсіздік шараларын білуі, алаяқтықтан қорғану жолдарын меңгеруі және құқық бұзушылық болған жағдайда бірден полицияға жүгінуі – қоғамдық тәртіпті қамтамасыз етудің шешуші факторлары.

Алтай ауданы әкімінің орынбасары Жанна Асқарова акцияның тұрғындардың өмір сапасын жақсартуға және мемлекеттік құрылымдарға деген сенімін арттыруға ықпал ететінін атап өтті.

Көшпелі кездесулер қарттар үйлерінде де өтті. Онда егде азаматтарға әлеуметтік қолдау, құжат рәсімдеу, мүліктік құқықтарды қорғау және мемлекеттік қызметтерді алу бойынша түсіндіру жұмыстары жүргізілді. Қарт адамдардың басым бөлігі құқықтық қиындықтарға байланысты өздігінен мемлекеттік органдарға жүгіну мүмкіндігінен айырылғандықтан, жеке кеңестерге ерекше көңіл бөлінді.

Алтай ауданында өткен бұл акция тұрғындардың құқықтық мәдениетін арттыруға, мемлекеттік органдардың ашықтығын күшейтуге және азаматтардың сенімін нығайтуға бағытталған маңызды бастамалардың бірі болып отыр.