Шығыс Қазақстанда биылғы өрт маусымы ерекше қауіпті болды. Мемлекеттік орман қорында тіркелген 27 өрттің басым бөлігі найзағайдың салдарынан шыққан. Орман шаруашылығы мекемелерінің техникамен қамтылуы әртүрлі, кейбір аймақтарда мамандар мен құрал-жабдықтардың жеткіліксіздігі тілсіз жаудың тез таралуына әсер етіпті. Жергілікті билік алдағы жылдары заманауи технологиялар мен материалдық базаны нығайтып, өрт қауіпсіздігін күшейтуді міндет етіп отыр, деп хабарлайды Altainews.kz тілшісі.

Облысымызда биылғы өрт қаупі бар маусым ерекше назар аударуды қажет етті. Бұл туралы Өңірлік коммуникациялар қызметі алаңында өткен брифинг барысында облыстық орман шаруашылығы және жануарлар дүниесі аумақтық инспекциясының басшысы Қайрат Мейрембеков мәлімдеді. Ресми деректерге сүйенсек, мемлекеттік орман қоры аумағында осы жылы 27 өрт тіркелген. Оның 15-і – облыс әкімдігіне қарасты орман шаруашылықтарында, ал 12 жағдай Катонқарағай мемлекеттік ұлттық табиғи паркінде орын алған.

Тексеру нәтижелері кадр тапшылығын, орман өртін сөндіру станцияларының жеткіліксіздігін, арнаулы техника мен байланыс құралдарының, қорғаныс киімдерінің жетіспеушілігін анықтаған. Сондай-ақ құжат сақтайтын және қызметкерлерге арналған тұрақты орынжайлардың жоқтығы жұмысқа кедергі келтіріп отыр. Бірқатар мекемеде найзағайдан қорғайтын құрылғылар да орнатылмаған.

Мәселен, сәуір айының басында Зайсан орман шаруашылығының аумағында 170 гектар жерді шарпыған ірі өрт болды. Оның 1,4 гектары – тікелей орман алқабы. Өрттің себебі – адами фактор. Тиісті органдардың дерегінше, өртті сөндіру кезінде бірнеше бұзушылық тіркелген, атап айтсақ техниканың өрт ошағына кеш шығуы (40 минут), өрт сөндіру көлігінің жарамсыз күйі, бастапқы кезеңде күш пен құралдардың жеткіліксіздігі. Қолайсыз ауа райымен бірге бұл кемшіліктер өрттің жылдам таралуына әкелген.

Катонқарағай ұлттық паркінде антенналарды орнату бойынша жұмыстар жүргізілгенімен, ауа райына және жолдың қиындығына байланысты 11 нүктеге техника жетпей, жұмыс толық аяқталмаған. «Қазақтелеком» мамандарына орнатылатын нүктелер санын көбейту туралы ескертілген, алайда нақты ұсыныстар әлі берілмеді.

Орман шаруашылықтары мен табиғатты қорғау мекемелеріне орман қорғау қызметкерлерінің санын арттыру, техника мен қажетті құрал-жабдықтарды толықтыру, қызметтік ғимараттар салу, ерте анықтау жүйелерінің техникалық құжаттарын нақтылау және антенналардың дұрыс орнатылуын қадағалау сынды мәселелерді шешу тапсырылды. Сонымен қатар төтенше жағдайларға әрекет ету алгоритміне енгізілген өзгерістер бойынша барлық қызметкерлерді оқыту қажет.

Биылғы өрт маусымы табиғи факторлардың басымдығына қарамастан, орман алқаптарының әлі де қорғанышқа мұқтаж екенін көрсетті. Маман тапшылығы, техниканың, өрт сөндіру станцияларының жеткіліксіздігі – жүйелі түрде шешуді қажет ететін мәселелер. Өңірде орман өртінің алдын алу мен жедел анықтауда заманауи технологияларды енгізу, материалдық базаны нығайту және мамандар санын көбейту – алдағы жылдардағы басты міндеттер болып қала береді.