Күршім ауданы, Маралды ауылының маңындағы алтын өндіру фабрикасының жұмысын заңды түрде тоқтатуға ешқандай негіз жоқ, ол жұмыс істейді. Өндірістің қауіпсіздігі қатаң бақыланатын болады. 
Бұл туралы Маралды ауылының тұрғындарымен кездескен экология және табиғи ресурстар вице-министрі Мансұр Ошурбаев пен өнеркәсіп және құрылыс вице-министрі Иран Шархан мәлім етті, деп хабарлайды Altaynews.kz тілшісі.
Бұл лауазымды тұлғалар кеше Күршім ауданы, Күршім ауылының Мәдениет үйінде аудан тұрғындарымен кездесу өткізген болатын. 
Осы ауданға қарасты Маралды ауылының тұрғындары ауыл маңында алтын өндіру фабрикасының құрылысына қарсы екендіктерін білдіріп жатқанына байланысты бұл кездесуге аталған ауыл тұрғындары да арнайы шақырылып, шағын автобус та бөлінген болатын. Бірақ бұл кездесуге Маралды ауылының тұрғындары келмеді.  
Сол себепті бүгін вице-министрлер, облыс әкімінің бірінші орынбасары, облыстық басқармалар басшыларынан құралған топ өздері Маралды ауылына барып, салынып жатқан алтын өндіру фабрикасының жұмысымен танысты. Бұл жерде қазір өндіріс жұмыстары тоқтап тұр. 
Экология және табиғи ресурстар вице-министрі Мансұр Ошурбаев, өнеркәсіп және құрылыс вице-министрі Иран Шархан және облыс әкімінің бірінші орынбасары Нұрымбет Сақтағанов фабрика басшылығына егер тұрғындарға, қоршаған ортаға залал тиетін болса, экологиялық және қауіпсіздік талаптары орындалмаса, заң аясында қатаң шаралар қолданылатынын, тіпті зауыт жұмысы тоқтатылатынын қатаң ескертіп айтты. 
Одан кейін ресми топ тұрғындармен кездесіп, олардың өтініш-талаптарын тыңдады. Нұрымбет Сақтағанов барлығы да заң аясында шешілуі керек екенін атап өтті. Ал экология және табиғи ресурстар вице-министрі, өнеркәсіп және құрылыс вице-министрі фабрикаға қатысты атқарылып жатқан жұмыстар туралы баяндап өтті. 
Олардың айтуынша, заңды түрде фабрика жұмысын тоқтауға ешқандай негіз жоқ, ол жұмыс істейді. Өндірістің қауіпсіздігі қатаң бақыланатын болады. Ең маңыздысы – халықтың жағдайы және заң. Сондықтан экологиялық жағдай қатаң бақылауда болады, ал заңсыз қазба жұмыстарын жүргізуге жол берілмейді. Фабрика аумағын аралап көрген экология вице-министрінің мәлімдеуінше, өндіріс орны тарапынан табиғатқа шынайы зиян келтірілмеген.