Өскемен қаласының әкімі Жақсылық Омар облыс орталығындағы бірқатар нысанды аралап, жөндеу жұмысының уақтылы әрі сапалы орындалуын қадағалады.

Қала тұрғындары мен қонақтарының сүйікті демалыс орнына айналған «Металлург» саябағында абаттандыру жұмысы аяқталуға жақын. Осыған дейін түрлі мерекелік шаралар өтетін шағын сахнасы бар ескі алаңның орнына жаңа скейт-парк салынатын болды, деп хабарлайды
Altaynews.kz сайты Didar ақпаратқа сілтеме жасап.

Жалпы, саябақтағы жөндеу жұмыстары былтыр басталған. Содан бері саябақтың кіреберісіндегі және ішіндегі жолдар жаңартылып, түрлі түсті плиталар төселді. Жаңадан 49 жарық бағанасы мен урналар орнатылып, орындықтар ретке келтіріліп, боялды.

Қала әкімінің айтуынша, концерттер өтетін сахна тұрған алаңның орнында скейт-парк салу туралы шешім қабылданды, өйткені ескі сахна ғимараты апатты жағдайда болған. Қазір аталған алаңның негіздемесі әзірленіп жатыр, одан кейін балалардың скейтборд тебуіне арналған спорттық жабдықтар орнатылатын болады.

Сондай-ақ қала әкімі саябақта кәсібін жүргізіп отырған кәсіпкерлермен ескірген аттракциондарды жаңарту мәселесін пысықтауды тапсырды.

Айта кетсек, бұл саябақ 26 жылдан бері жөндеу көрмей, тозып тұрған еді. Себебі демалыс орны 1996 жылы жеке компанияға берілген соң мұнда абаттандыру жұмыстары жүргізілмеген. Тек 2021 жылы сот шешімімен саябақ жергілікті әкімдіктің балансына берілген болатын. Содан бастап саябақты жаңғырту жұмыстары қолға алынып, екі кезеңмен жүргізілді. Биылғы абаттандыру жұмыстарын 15 шілдеде аяқтау тапсырылды.