21-35 жас аралығындағы жастарға бизнес-идеяны іске асыру үшін 2,5% жеңілдік қарастырылған шағын несие беріледі.

Несие беру кезінде мерзімдік, төлемдік, қайтарымдылық, мақсатты пайдалану қағидаты ескеріледі, деп хабарлайды Altaynews тілшісі.

Несиенің мынадай шарттары бар:

– Шағын несие беру мерзімі 5 жылға дейін (мал шаруашылығы жобалары үшін – 7 жылға дейін);

– Шағын несиенің ең жоғары сомасы – 5 млн теңгеге дейін;

– Номиналды сыйақы мөлшерлемесі жылына 2,5%-дан аспайды;

– Кепілдің болуы міндет;

– Негізгі борышты және сыйақыны өтеу бойынша жеңілдік кезеңі шағын несие беру мерзімінің 1/3 бөлігінен аспайды;

– Шағын несие алуға өтініш берген кезде 5 жылдан аз мерзімге ЖК болуы тиіс.

«Аграрлық несие корпорациясы» АҚ бизнес-жобаларды бағалап, несие береді.

Бизнес-жобаны бағалаудан кейін оң қорытынды алған өтініш берушілердің құжаттары бизнес-жобаларды іріктеу жөніндегі конкурстық комиссияның қарауына жіберіледі. Өтініш беруші өзінің бизнес-жобасын комиссия отырысында ұсынады.

Бизнес-жобаларды іріктеу критерийіне өзектілігі, негізділігі, экономикалық орындылығы, әлеуметтік маңыздылығы, іс-шаралар жоспары және жобаның маңыздылығы кіреді.

Толық ақпарат алу үшін Өскемен қаласы, Қабанбай батыр, 51 мекенжайы бойынша орналасқан «Аграрлық несие корпорациясы» АҚ-ға жүгіну қажет. Сонымен қатар арнайы QR-код бойынша хабарласуға болады.