Өскеменде оқу құралдары жәрмеңкесі өтіп жатыр
Фото: Ынтымақ Толқын
Өскемен қаласында 10 тамыз күні оқуға қажетті құрал-жабдықтар сататын жәрмеңке ашылды.
Жәрмеңке кәсіпкерлер мен баласын мектепке дайындаған ата-ананың басын бір жерге қосты, деп хабарлайды Altaynews тілшісі.
Үш күнге созылатын жәрмеңкеде мектеп формасы, қажетті құрал-жабдық, сөмке сынды бұйымдар сатылып жатыр. Мұндағы заттар нарық бағасынан төмен бағада ұсынылған.
– Тамыздың 10-нан бастап «Достық үйінде», яғни Назарбаев даңғылы 68 мекенжайында мектеп тауарлары сатылатын жәрмеңке өтіп жатыр. Онда қаланың ірі кәсіпорындары қатысып отыр. Мектепке арналған тауарларды шығаратын, сатататын кәсіпкерлер де келіп қатысып жатыр. Негізінде, бұл шара жыл сайын өткізіледі. Мұнда тауарлардың бағасы нарықтық бағадан қарағанда 10-15 пайызға арзанырақ. Сондықтан біз қала тұрғындары мен қонақтарын осы жәрмеңкеге шақырамыз, – дейді Өскемен қаласының кәсіпкерлік және ауыл шаруашылығы бөлімінің басшысы Гасан Тұрғамбаев.
Жәрмеңке сағат 15:00-ден 20:00-ге дейін Металлургтер мәдениет сарайының (Назарбаев даңғылы, 68 үй) жанында өтеді.
– Кешеден бері жәрмеңке болып жатыр. Кешегі жәрмеңке орташа деңгейде өтіп еді, бүгін қарқын жақсырақ. Ата-аналар келіп жатыр. Біздің формамыз 1-сыныптан 11-сыныпқа дейінгі оқушыларға арналған. Өзіміз өндіреміз. Жилет, белдемше тігеміз. Біз заттарымызды 10-15 пайыз төмен бағада әкеліп отырмыз. Өз бағасы 7-7,5 мың болады, осында 6-6,5 мыңға әкеліп сатып жатырмыз. Сатылым көлемі кешегіден қарағанда бүгін жақсырақ, – дейді тауар өндірушінің өкілі Толғанай Бөкей.
Ата-аналар жәрмеңкеде ұсынылған тауар бағасының нарықтағы бағадан төмен екендігін баса айтты.
– Мен балаларыма оқу құралдарын алуға келіп едім. Өзім ойлағаннан жақсы бағада алдық. Сондай қымбат емес. Өзімізге ұнайтын, өзімізге керекті құрал-жабдықтардың бәрін алдық. Сондай қымбат емес екен. Бір балам биыл 6-сыныпқа барады, екінші ұлым 3-сыныпқа барады, үшінші ұлым 1-сыныпқа барады. Қажетті оқу құралдарының барлығын алдық. Форма жағы біраз қымбаттау екен, – дейді мектепке балаларын дайындап жүрген ана Миргүл Тоқтасынова.
Ата-аналар жәрмеңкеге баруға әлі де үлгере алады. Жәрмеңке 12 тамыз күні аяқталады.
Оқи отырыңыз
