Бүгін Өскеменде Катонқарағай ауданының жәрмеңкесі өтіп жатыр. 

Базарда өзге аудандарды қойып, еліміздің өзге өңірлерінде кездесе бермейтін, тек Катонқарағайдың брендіне айналған панты мен бал өнімдері келушілерге молынан ұсынылды, деп хабарлайды Altaynews.kz сайты.

Базаршы жұрт бағасы арзан, сапасы жоғары азық-түлік өнімдерін сатып алып жатқанда, мына жақта білекті жігіттер 30 келіге жуық салмақ тартатын балды төбесінен асыра көтеріп, сайыс көрігін қыздырды.

Жәрмеңкеге апта сайын келіп, күш-қарымын көрсетіп жүрген Сұлтан Амантай қанжығасын майлап қайтты. Ол белтемірге байланған 30 келі тартатын балды 40 мәрте көтеріп, сыйлыққа өзі көтерген балды алды. Өткен жәрмеңкеде Сұлтан қой көтеріп, жеңімпаз атанған. Ал бұл жолы бәйгеге тігілген қошқарды 205 рет көтерген тарбағатайлық Әділет Солтанов чемпион болды. Әділеттің қой көтеруден жеке рекорды 310 рет екен.

Қымыз ішуден сайысқа түскендердің өнерін аймақ басшысы да тамашалады. Екі литрлік шыны ыдысқа шүпілдете толтырған қымызды белгілінген уақытта тауысу керек. Шарт солай. Бұл сайыста қатонқарағайлық Мерей мен өскемендік Рустам екеуі қымызды бірдей түгесіп, бірінші орынды бөлісіп алды.    

Айта кетсек, кеше Катонқарағай ауданының мәдени күндері аясында "Ертіс концертте"  гала-концерт пен көрме өткен болатын.