KZ
Өскемен
+21°
ясно жел 5 м/с, З
479.05 534.57 5.17

Қазақстан азаматтары интернет алаяқтықтың кесірінен 13 млрд теңгеден айырылған

Фото: egemen.kz

30.10.2023, 17:10 223

ҚР ІІМ Криминалдық полиция департаменті Киберқылмысқа қарсы күрес орталығының бастығының орынбасары Рүстем Дүйсетаев Қазақстанда кең тараған интернет алаяқтық түрлерін айтып берді.

Оның дерегінше, осындай қылмыстардан азаматтар 13 млрд теңге шығынға ұшыраған, деп хабарлайды Altaynews Kazinform агенттігіне сілтеме жасап.

— Жыл басынан бері азаматтарды интернет арқылы алдауға байланысты 15,5 мың қылмыс тіркелген. Бұл әрекеттердің салдарынан зардап шеккендерге 13 млрд теңге залал келген. Әлі де алаяқтардың ең көп таралған әдісі — онлайн сауда. Онлайн саудамен байланысты 7 мың алаяқтық жасалды, - деді Рүстем Дүйсетаев министрліктің апталық брифингінде.

Банктерде және микрокредиттік ұйымдарда жалған онлайн қарыз рәсімдеудің 1 600 фактісі тіркелген.

Азаматтар ақшаны тез көбейту үшін, олардың күмәнділігіне қарамастан әртүрлі схемаларға қатысуды жалғастырып жатыр. Бір жыл ішінде 1200 қазақстандық осындай схемалардың құрбаны болды, олар өз ақшаларын жұмыс істемейтін инвестициялық жобаларға салған. Осындай мақсат үшін несие алғандар да бар.

— Алаяқтар ірі компаниялардың, соның ішінде ұлттық компаниялардың, банктердің, криптобиржалардың атынан жалған сайт құру арқылы азаматтарды қызықтырады. Бұл ретте «менеджерлермен» және «брокерлермен» барлық қарым-қатынас онлайн режимде, оның ішінде мессенджерлер арқылы өтеді. Кейбір жағдайларда алаяқтар үлкен соманы тарту үшін бір реттік дивиденд төлейді, - дейді министрліктің өкілі.

Фишингтік сілтеме жіберу арқылы азаматтардың шотынан ақша ұрлау бойынша 1 мың дерек тіркелген.

— Банктер, құқық қорғау органдары қызметкерлерінің атынан жасалатын алаяқтық ерекше алаңдаушылық туғызады. Осы тәсілмен жыл басынан бері 3 мыңнан астам қылмыс жасалған. Алаяқтар шоттағы күдікті операциялар немесе несие рәсімдеу әрекеті туралы хабарлайды және банктің алаяқ қызметкерлерін ұстау бойынша арнайы операция жүргізіліп жатқанын айтады. Банк немесе полиция қызметкерлері ешқашан дербес деректерді сұрамайтынын және телефон арқылы арнайы операциялар жүргізбейтінін атап өткім келеді, - деп түсіндірді Рүстем Дүйсетаев.

Мұндай қылмыстардың көпшілігі шетелден жасалады, бұл олардың жолын кесу процесін қиындатады.

Біздің Instagram парақшамызға жазылыңыз

Жаңалықтарды ең бірінші болып оқыңыз

жазылу
Кликните на изображение чтобы обновить код, если он неразборчив