«Жайлы мектептер» үшін жаңа форматтағы 7 мың педагог даярланады
Фото: top-fon.com
Жоғары білімді және ғылымды дамытудың 2023-2029 жылдарға арналған тұжырымдамасына енгізілетін өзгертулер мен толықтырулар жобасында «Жайлы мектептерге» арнайы педагогтер даярланатыны көрсетілген, деп хабарлайды Altainews.kz тілшісі Kazinform агенттігіне сілтеме жасап.
– «Жайлы мектеп» жобасы аясында болашақ мектептер үшін жаңа формациядағы мұғалімдер дайындалады. Елдегі өзгермелі демографиялық ахуалды және педагог кадрлардың қартаюын ескере отырып, педагог кадрларға қажеттілік болжанады. Мектептердің жаңа үлгілеріне сәйкес білім беру бағдарламалары өзектендіріледі. Болашақ мұғалімдердің зерттеу құзыреттілігін дамыту үшін «Іс-әрекеттегі зерттеу», «Білім берудегі деректерді зерттеу және талдау әдістері» пәндері енгізіледі, – делінген тұжырымдама жобасында.
Тұжырымдаманы іске асыру жоспарында осы мақсатпен «Жайлы мектеп» жобасы аясында салынатын мектептерде сабақ беретін 7 мың мұғалімді жаңа тәсілмен дайындау 2023-29 жылдар аралығында іске асатыны айтылған.
– «Жайлы мектеп» жобасы шеңберінде жаңа формациядағы мұғалімдерді даярлау үшін педагогикалық бағыттар бойынша кемінде 7 мың мемлекеттік білім беру гранты бөлінеді, – делінген құжатта.
Құжат 18 сәуірге дейін қоғам талқысында болады.
Оқи отырыңыз
