Сырдария өзенінен заңсыз су алып келген 9 тіркелмеген сорғы қондырғысы анықталды. Бұл туралы Арал-Сырдария бассейндік инспекциясы айтты, деп хабарлайды Altainews.kz тілшісі.

Мамандардың айтуынша, заңсыз орнатылған қондырғылар арнайы рұқсатсыз жұмыс істеп келген. Тексеру нәтижесінде 9 әкімшілік іс қозғалып, құқық бұзушыларға жалпы сомасы 1,7 миллион теңге көлемінде айыппұл салынды.

Сонымен қатар, су заңнамасын сақтау және жаңадан күшіне енген Су кодексін түсіндіру мақсатында инспекция өкілдері 73 елді мекенде ақпараттық кездесулер өткізген.

Су ресурстарын тиімсіз пайдаланудың тағы бір фактісі Тобыл-Торғай бассейнінде тіркелді. Онда су есептегіш құрылғысының істен шығуы мен құбырдағы ақау салдарынан су заңсыз пайдаланылған. Нәтижесінде су тұтынушыға айыппұл салынып, олқылықтарды жою туралы нұсқама берілді.

Дереккөз: Су ресурстары және ирригация министрлігі