15 қыркүйек 2025 жылы елімізде жалпыға бірдей декларациялау аясындағы салықтық есептілікті онлайн жолдау мерзімі аяқталады. Азаматтар 2024 жылға арналған 250.00 (активтер мен міндеттемелер туралы) және 270.00 (кірістер мен мүлік туралы) нысандарын электронды түрде бүгін түн ортасына дейін тапсыра алады, деп хабарлайды Altainews.kz тілшісі.

Бұған дейін қағаз түріндегі нұсқаны қабылдау мерзімі 15 шілдеде аяқталған болатын.

2025 жылы декларация тапсырудан бірқатар санаттағы азаматтар босатылған. Олардың қатарында зейнеткерлер, студенттер, жеке компания қызметкерлері және үй шаруасындағы әйелдер бар. Бірақ бұл жеңілдік тек шетелде мүлкі, банктік шоты, ірі мәмілесі немесе цифрлық активтері жоқ адамдарға қатысты.

Форма 250.00 негізінен мемлекеттік сайланбалы лауазымдарға кандидаттар мен олардың жұбайларына, нотариустарға, адвокаттарға, сот орындаушылары мен медиаторларға, сондай-ақ шетелде ірі активтері немесе есепшоттары бар азаматтарға міндетті.

Форма 270.00 мемлекеттік қызметшілерге, компанияларда 10%-дан астам үлесі бар құрылтайшылар мен басшыларға, шетелде табыс табатын азаматтарға (мысалы, фрилансерлер, инвесторлар), жалға беру немесе жеке қызмет көрсетуден кіріс алатындарға жүктеледі. Сондай-ақ жыл ішінде құны 20 000 АЕК-тен (78,6 млн теңге) асатын ірі сатып алу жасаған кез келген азамат осы нысанды толтыруға міндетті.

Жалақы, зейнетақы, туыстар арасындағы ақша аударымдары және Қазақстандағы құны 78,6 млн теңгеден төмен мүлік бұл есептілікте көрсетілмейді.

Декларацияны тапсыру egov.kz, КГД салық төлеушінің кабинеті, e-Salyq Azamat және egov Mobile қосымшалары, сондай-ақ Kaspi, Halyk, Freedom секілді ірі банктердің мобильді сервистері арқылы жүзеге асырылады.

Заңға сәйкес, декларацияны бірінші рет уақытылы тапсырмағандарға тек ескерту жасалады. Алайда қайталанған жағдайда 15 АЕК (58 980 теңге) көлемінде айыппұл салынады.

Елизавета Седых