Өскеменде шаштараз, механик, дәнекерлеуші мен жүргізушілер жарысқа түседі, деп хабарлайды Алтайньюс тілшісі. Бұл туралы бүгінгі «WorldSkills Shygys - 2019» аймақтық чемпионатын өткізу жөніндегі брифингте айтылды.

Айтпағымыз, жұмысшы мамандықтары бойынша жастар арасындағы аймақтық кәсіби шеберлік чемпионаты басталуға жақын.

«WorldSkills Shygys» төртінші рет өткелі тұр. 14 мамыр күні шығыстың бас шаһарында басталатын чемпионат үш күнге жалғаспақ. Жеңімпаздар республикалық додаға жолдама алады. Ол жерде үздік шықса, Татарстан астанасы Қазанда өтетін әлем чемпионатында ел намысын қорғайды жас мамандар.

– Біздің өңірдің жастары шын мәнінде білімді, білікті. Сөзімізге өткен жылғы чемпионат қортындысы дәлел. Әлемдік додада 8 өреніміздің жеңіске жеткенін білесіздер. Сол себепті барлығы біздің аймақтан үлкен нәтиже күтеді. Екінші қырынан, біз жұмысшы мамандықтарының беделін арттырып, жастардың өз ісінің шебері болып қалыптасуына зор ықпал етудеміз, – деді ШҚО әкмінің орынбасары Әсем Нүсіпова.

«WorldSkills Shygys - 2019» аймақтық чемпионатын өткізу жөніндегі брифингті 360° әсерінде көргіңіз келсе мына сілтемеге өтуіңізге болады