ТЖ қызметкерлері балалардың демалысы қауіпсіз өтуі үшін лагерьлерге барып, көптеген іс-шаралар өткізеді. Олар балаларға техника мен жауынгерлік киімдерді көрсетіп, жеткіншектерге қауіпсіздік шараларын түсіндіреді.

Бұл жолы ШҚО ТЖД құтқарушылары "Көшбасшылар клубы" жазғы лагеріне барып, балаларға қауіпсіздік шараларын үйретті, деп хабарлайды Altaynews тілшісі.

Мамандардың дерегіне сүйенсек, балалар жазда көп уақытты су обьектілеріне жақын жерде өткізеді. Алайда қауіпсіздік ережелерін әрдайым орындай бермейтін көрінеді.

Құтқарушылар балаларға теориялық нұсқау беріп, алғашқы көмек көрсету ережелерін үйретті. Әрдайым тек жабдықталған шомылу орындарына және тек ата-аналарымен бірге бару керек екенін еске салды. Сонымен қатар лагерьдегі балаларға өрт қауіпсіздігі, жер сілкінісі кезіндегі тәртіп ережелері үйретілді. Сабақ соңында құтқару шеңберін, "Александров арқанын" пайдалану дағдылары бойынша практикалық жаттығулар өткізілді және азаматтардың қауіпсіздігін күзету қызметіне қатысатын кинологиялық құрам таныстырылды.